حالات الصبر على الزوج

[امانى يسرى محمد]

علموا بناتكم وأولادكم لما يتجوزوا أن الصبر بيكون على صعوبة الأوضاع مش على سوء الأخلاق
يعني نصبر على الفقر لغاية ما ربنا يفرجها
نصبر على المرض لغاية ما ربنا يشفيه(يشفيها)


وان الصبر ده فضل مش فرض يعني اختياري ، تصبر لو قادر ، والفيصل إقامة حدود الله (يعني القيام بالواجبات اللي فرضها الشرع تجاه الآخر).
يعني لو صبرك على الظروف الصعبة هيخليك متقدرش تقيم حدود الله ، يبقى الحل الأمثل والذي يرضي الله هو الانفصال .
ومن ضمن الصبر
الصبر على اختلاف الطباع
لغاية ما تعرف مفاتيح اللي قدامك ، وتعرف تتعامل معاه بطريقة تسعده وتسعدك وترضي ربنا طبعا .
لكن انك تطلب من حد انه يصبر على سوء الأخلاق وضياع الحقوق ده أمر لا يرضي الله ولا تستقيم معه الحياة .
وكل صبر من النوع ده هو قهر
الصلح من الصلاح يعني اللي بتطلب منه يصبر ويستمر من غير ما تلاقي الطرف التاني بيتحسن في المعاملة يبقى طلب حضرتك كان نصيحة بتضييع الحقوق وهدم النفوس .


لو كل سييء الخلق لقى حسم من الطرف التاني(رجلا أو امراة) وأهله ،كان انصلح وكف اذاه .
ربنا سبحانه اسمه الحق، ولا يرضى أبدا ضياع الحقوق .
علشان كده اي حد يتدخل للصلح لازم يتقي الله وميبقاش كل همه أن يبقي على البيت ، الإصلاح الحقيقي لا يبنى الا على التقوى، وأي صلح فيه تضييع للحقوق بعيد كل البعد عن التقوى.
ومن ناحية تانية هو بيبقى مجرد مسكنات وبتكون النهاية انفصال ولكن بعد تدمير نفسية (الطرف اللي ضاع حقه )


يا رب. اجعل بين كل الأزواج والزوجات مودة ورحمة تجعل الزواج سكنا لا سجنا.
وألهم كل من يتوسط للصلح رشده؛ فيحكم بما يصلح ولا يفسد ،ويحفظ الحقوق ولا يضيعها.





د. أمينة خلف