( منوحيالصورة )
وشى اللى متشقق راسم خريطة عمر ، عينى اللى فيها حنين شافت سنين المُر ، أنا كنت بردو زمان جميل كده زيكم ، و كنت بتباهى بنفسى لما بمر ، دايس على الدنيا و ما كانش حد قدى ، مايهمنيش الكون ده كله يبقى ضدى ، ومادام معايا صحتى فى دراعى شايف قوتى ، يادنيا أنا جايلك يا تميلى يا هتتهدى ، و العمر جرى بيا و سرقنى كده ، وشى مشقق و شقوقه متعدده ، من فوق لتحت و من يمين لشمال ، و أعند و أكابر و هى متسدده ، لا ليا ابن ، صديق ولا حبيبه ، عيشت الحياه ماتعدنيش عيبه ، ياما أفتريت على بشر مساكين ، ياما رغيت ما حفظتش الغيبه ، الدنيا جريت زى لحظة حلم ، و كأنى دلوقتى فى أخر الفيلم ، لا الخير بيكسب ولا الشرور تنفع ولا الحقوق ينفع ترد الظلم ، أوعاك تفكر أن الجمال باقى ، القوه مهما تكون فى يوم ما هتلاقى ، غير الوهن و الشقى ، و خريطة متشققه و نظره للماضى بحنين لأشواقى ، لو بس أرجع يوم و أعيش فى سلام ، و أحيا بعدل الله خلُق مع دين ، وبإيه يفيد الندم فى خيال على أوهام ، زى اللى قالوا لربنا أرجِعنا نعمل صالحين ، عيش بعدل الله وما تكابرش بقوتك ، كله زايل كله فانى و أخرها بس محبتك ، خلى البشر يفتكروا منك كل خير ، يفتخروا بيك و بصُحبتك ، أخر الكلام خليك كده للخير إمام ، و يا بخت من راجع حياته لخصها فى : ( عاشها بسلام )