السياحة والسفر والرحلات

ثقافة السياحة والسفر صور سياحية واماكن ومعالم ايطاليا اسبانيا اسيا الاردن الخليج المانيا النمسا اوروبا عواصم سياحية و سفر رحلات دليل السائح اسعار المطاعم في الاماكن السياحية السفر و السياحة نصائح السفر احوال الطقس و اسعار العملات مواضيع مخصصة للمسافرين والسياح وكتساب خبرات.

نسخ رابط الموضوع
https://vb.kntosa.com/showthread.php?t=14139
6199 0
08-01-2020 04:38 PM
#1  

Tumارخص7 اماكن للفسح والخروج فى العيد فى مصر


ارخص7 اماكن للفسح والخروج فى العيد!
- متحف العلم الحيوانى
دة مكان مش معروف اوى لناس كتير جدا بس مكان جميل جدا ومش هتصدق أنه ب 10 جنية بس
موجود جوة حديقة الحيوان بالجيزة ( بس لما تخشه هتفصل خالص عن الجنينة ) لانك هتخش مكان مكيف
وطريقة العرض فيه غاية فى السهولة والمتحف نضيف جدا يعنى اللى مش حابب يدخل الجنينة من الاساس ممكن يقطع التذكرة ويتوجه على المتحف على طول ( اللى معاه أطفال هيتبسطوا اوى ودة الطبيعى ) بس اللى مش طبيعى أننا ككبار هننبهر بأسماء الحيوانات وأشكالها وحتى الهياكل الحقيقية والحيوانات المحنطة
والمتحف عبارة عن ثلاثة أدوار وفيه مجموعة كبيره جدا من الحيوانات المحنطة ، فعلا تحفه فى كل حاجه واستفاده رهيبه والناس هناك مابتبخلش بأى معلومه والأطفال هيستمتعوا جدا بالمناظر
التذكرة ب10 جنيه ( تذكرة منفصلة عن تذكرة الحديقة ) وبتقطعها من قدام المتحف
المواعيد من 10 صباحا : 4 عصرا

ارخص7 اماكن للفسح والخروج فى العيد فى مصر 3almik.com_01_20_159

بيت زينب خاتون
دة كنز كدة أسمة بيت زينب خاتون ( حاجة ملهاش علاقة بالقهوة علشان محدش يربط بس)
البيت دة زيارتة تخيل ب 10 جنية بس والطالب ب 5 جنية
البيت عبارة عن 3 ادوار ..و هنقولك على حاجات معينة تركز فى أنه ازاى لما تدخل من الباب متشوفش اللى جوه البيت نهائيا لأن المدخل منكسر
والدور الاول هتلاقى الغرف اللى بيستقبل فيها الضيوف
طيب تسمع عن السلاملك والحرملك طبعا الفرق بينهم هتعرفة فى الدور التانى بس أسأل الناس هناك بقى علشان نشجعكم تروحوا
الدور الثالث غرفة الاميرة هتشوف الزجاج الملون والقباب الى بتدخل التهوية الطبيعية للمكان
تذكرة الدخول 10 جنيه
تذكرة تصوير الموبايل 15
تذكرة الكاميرا البروفيشنال 120
سعر الفوتوسيشن :600 جنيه
المواعيد من 9 صباحا ل 4 عصرا
العنوان : خلف الجامع الأزهر تخلى مستشفى الحسين الجامعى على يمينك وتمشي على طول هتلاقى البيت على شمالك

ارخص7 اماكن للفسح والخروج فى العيد فى مصر 3almik.com_01_20_159

متحف النسيج المصري .. Egyptian Textile Museum
أيه رأيكم فى خروجة حلوة بليل كدة فى شارع المعز
حاجة جديدة ومعظمنا مشفهاش قبل كدة وكمان بسعر رمزى 10 جنية للتذكرة وتخيل بقى أن المتحف ده مصنف الرابع عالميا على مستوى المتاحف اللى زيه ( يعنى أنت رايح تتفرج على كنز )
طيب أنتم هتلاقوا ايه فى المتحف ده ... المبنى عبارة عن دورين فيهم 250 قطعة نسيج و15 سجادة
هتلاقوا كسوة الكعبة المشرفة اللى كانت بتتصنع هنا فى مصر فى عهد الملك فاروق وكانت بتروح لحد السعوديه وكل دة هتعرفوا قصصه وحكاياته وانتم هناك .وكل قطعة في المتحف هتلاقوا مكتوب عليها قصة وحكاية وتسلسل التاريخ المصرى وتطور اللبس والشياكة بقى
كل قطع النسيج اللى كانت متوزعة على كل متاحف مصر تم تجميعها فى المتحف ده واتسمى متحف النسيج ودى بصراحة فكرة ممتازة ..
وفى القسم الفرعونى وهو أكبر قسم هتشوفوا فيه كل حاجة حتى البامبرز كانوا بيستخدموه الامهات ازاى فى وقت الفراعنة وشنطة الغيارات وحاجات مهما حاولنا نشرحها عمر ما عقلك يتخيلها
طيب تعرفوا أن المبنى اللى هتخشوه فى المتحف ده هو أصلا أثر وأثر مهم جدا أسمه سبيل محمد على .. وكمان الموضوع مش مقتصر على قطع النسيج بس أنتم فى المتحف ده هتعرفوا الناس دى كانت بتنضف هدومها ازاى وايه المعدات اللى كانوا بيستخدموها
وازاى بعد السنين دى كلها لسه الألوان محافظة على زهوتها في المُجمل فهو متحف جميل جداً ويستحق الزيارة
تذكرة التصوير فى المتحف حتى لو بالموبايل ب 20 جنية
العنوان : 121 شارع المعز لدين الفاطمي بمنطقة الحُسين – القاهرة
طب تروح ازاى لهناك ؟ نركب مترو وتنزل رمسيس أو العتبة ومن هناك عربية للحسين وتنزل الغورية وتعدى الشارع حتلاقى شارع المعز
سعر التذكرة : 10 جنيه والتصوير ب 20 جنيه

ارخص7 اماكن للفسح والخروج فى العيد فى مصر 3almik.com_01_20_159

الأتوبيس النهري
ممكن تسميها خروجة او ممكن تسميها توصيلة على حسب مكانك ومشوارك
خروجه ممتازه جداً و على أد الأيد سعر التذكرة : لا يتعدى الى 5 جنيه واحلى ما في الخروجه دي بساطتها
في الاتوبيس هتشوف اللي طالع يفصل من زحمة الشوارع في عز الظهر ، وهتشوف أسرة بأطفالها طالعين يتفسحوا و يغيروا جو
الأتوبيس النهري بيربط بين أنحاء القاهرة الكبرى ( القاهرة – الجيزه – القليوبيه – حلوان )
و يعتبر بديل غير تقليدي للمواصلات المعتادة وفيه منه نوعان ( المغطى – المكشوف المكيف )
و العادي يكون المغطي للركاب اما المكشوف للرحالات الطويلة
أشهر محطات الأتوبيس النهري :
* محطه ماسبيرو ( أمام مبني الأذاعه والتليفزيون )
* محطه الجامعه ( بجوار كبري الجامعه )
* محطه الساحل
* محطه مصر القديمه
* محطه أمبابه
* محطه القناطر الخيريه
مواعيد الأتوبيس النهري :
من الساعه السابعه صباحاً و حتي الساعه الثامنه مساءً
اما بالنسبة للـ الأتوبيس النهري المكيف ( المكشوف ) وده بيبقى مكيف و مجهز بـ كراسي جلد حلوه
وبه جزء علوي مكشوف وكمان فيه Dj و مزيكا و ده بيعمل نوعين من الرحالات :
* رحلة لمدة ساعه بـ 10 جنيه الفرد
ودي مواعيدها من الساعة 4 ونص عصراً و حتى الساعة 12 ليلاً وبتطلع رحلة بمعدل كل ساعة ونص
* رحلة القناطر الخيرية بـ 15 جنيه الفرد
ودي مواعيده من الساعة 8 صباحاً و حتى الساعة 12 ظهراً طوال ايام الأسبوع


ارخص7 اماكن للفسح والخروج فى العيد فى مصر 3almik.com_01_20_159

متاحف قصر عابدين
ودة مكان موجود فيه عدد كبير من التحف والمقتنيات القيمة جدا وقصر عابدين من أفضل الأماكن اللى الواحد يقدر يزورها أثريه و التصوير فيها تحفه
اول ما تدخل حوالين القصر فى جناين كتير دى لوحدها مهديه للأعصاب و بعد لما تدخل القصر هما مقسمين زى غرف كده كل واحده فيها حاجه مثلا غرف للأسلحه و الخناجر و الفضيات و الذهب و الماس و الهدايا اللى اتبعتت للملك فاروق من الأمراء
المكان نضيف جدا و متأمن
القصر مفتوح كل يوم من 10 الصبح ل 12:30 الضهر ما عدا الجمعه
التذكرة 10 جنيه و فى 5 جنيه للموبايل

ارخص7 اماكن للفسح والخروج فى العيد فى مصر 3almik.com_01_20_159

المكان دا هتقضي فيه يوم مختلف جدا جدا و مناسب للصغار و الكبار
متحف القوات الجويه الجديدة
سعر تذكره ب20 جنيه بس بتعيش فيها مغامره انك طيار حربي و بتشوف كل انواع الطيارات المستخدمه د و متعلقات الطيارين و غيرها
و محاكاه للطيران بالطيارات المقاتله
دا غير انه فيه حديقه كلها خضره و مناطق العاب للاطفال اللي بيدخلو مجانا لحد 10 سنين
و سينما 3D عن بطولات القوات الجوية و مرشد سياحي بيشرح كل التفاصيل
عنوان المتحف: القاهرة، شارع صلاح سالم، قاعدة ألماظة الجوية بجوار مجمع الجلاء العسكري، أمام الكلية الحربية

ارخص7 اماكن للفسح والخروج فى العيد فى مصر 3almik.com_01_20_159

برج القاهره
فُسحه لذيذه وجميله للكبار والصغار ومش مُكلفه وفيو تحفه من أعلى ارتفاع في القاهرة
عنوانه ما يتوهش "طبعاً" شارع البرج في الجزيرة بجوار النادي الأهلي، أقرب محطة مترو أنفاق هي الأوبرا. ولو رايح بعربيتك روح بدري شويه عشان الركنه صعبه حبتين هناك وروح بدري كمان عشان تتجنب طوابير انتظار الأسانسير الطويلة
اجمل وقت هو الغروب وانسب وقت للزيارة بعد العصر وتجنب الظهر عشان الشمس هتضايقك وتجنب الجمعه والاعياد الرسميه عشان الزحمة
مواعيد العمل من 9 ص ل 1 ص والتذكرة بـ25 ج للمصريين وبـ 150 ج للأجانب، ولما بيشك فيك بيطلب تحقيق شخصيه عشان يتأكد انك مصري ! المدخل من تحت جميل وواسع ولازم تتصور سيلفي مع النسر النحاسي الضخم الي علي البوابه
وفي مطعم وكافيه تحت ومكان لعب أطفال Playing Area بس فرجهم من فوق الأول بعد كدة ممكن تنزل تلاعبهم
بعد التفتيش وقطع التذاكر هتطلع في الأسانسير وهو للأسف ضيق جداً مش بيشيل اكتر من 5-6 أشخاص بالعافيه بس سريع، في خلال دقائق حتكون علي ارتفاع 60 دور (187 متر)! وممكن تأجر عدسة تلسكوب ب 5ج بس اشترى التذكرة من تحت قبل ما تطلع
وفوق بقى الفيو وهمي حتشوف القاهرة والجيزه كلها ونهر النيل والفنادق تحتك ولو ركزت هتشوف القلعه والأزهر بارك والثلاث أهرامات كمان !
ولو معاك كاميرا فيها زوم كويس هتصور صور تحفه! ومافيش مصاريف للكاميرا! في فوق مطعمين واحد ثابت والثاني بيلف ، المطعم جميل والفيو رائع بس أسعاره مرتفعه شويتين. يعني الطبق الرئيسي سعره من 140 ل ـ250 ج !
بس ممكن تشرب حاجه او تاكل أيس كريم يعني في المعقول نسبياً لو حابب او عامل حسابك. هي خروجه جميله ما تتسابش ومكان لازم تروحه انت واصحابك او انت واسرتك عشان تتبسط أكيد وماتخافش، أمان جدا وارتفاع السور فوق أمان للولاد والكبار كمان.

ارخص7 اماكن للفسح والخروج فى العيد فى مصر 3almik.com_01_20_159



اظهار التوقيع
توقيع
ام رونزا
يُقَالْ أنْ مِنْ تَعود عَلىَ الصَمتْ ،
باستطَاعتَهُ وَقتٍ { العِتَابْ} أنْ يُدمَر قَلبكَ بكلمَه .. !








الكلمات الدلالية (Tags)
فى, للفسح, مصر, والخروج, العيد, اماكن, ارخص7

أدوات الموضوع
انواع عرض الموضوع

الانتقال السريع


الساعة الآن 01:54 PM


Powered by vBulletin® Version 3.8.11 Beta 4
Copyright ©2000 - 2024, vBulletin Solutions Inc.
new notificatio by 9adq_ala7sas
User Alert System provided by Advanced User Tagging (Lite) - vBulletin Mods & Addons Copyright © 2024 DragonByte Technologies Ltd.

خيارات الاستايل

  • عام
  • اللون الأول
  • اللون الثاني
  • الخط الصغير
  • اخر مشاركة
  • لون الروابط
إرجاع خيارات الاستايل